وفاقی حکومت نے اسلام آباد میں اپوزیشن جماعت جمعیت علمائے اسلام (ف) کو آزادی مارچ منعقد کرنے کی اجازت دینے کا فیصلہ کرلیا ۔
اس بات کا فیصلہ وزیراعظم عمران خان نے حکومت کی مذاکراتی ٹیم سے ملاقات کے بعد کیا ۔ واضح رہے کہ حکومت کی جانب سے وزیر دفاع پرویز خٹک کی سربراہی میں بنائی گئی مذاکراتی ٹیم نے وزیراعظم عمران خان سے ملاقات کی تھی اور اپوزیشن کے آزادی مارچ پر تبادلہ خیال کیا تھا ۔
اس اہم ملاقات کے بعد حکومت کی طرف سے جاری اعلامیے میں بتایا گیا کہ جمہوری نظریات کو برقرار رکھنے کے اپنے پختہ یقین کے ساتھ حکومت کی جانب سے یہ فیصلہ کیا گیا کہ اگر سپریم کورٹ اور اسلام آباد ہائی کورٹ کے فیصلوں میں تشریح کیے گئے آئین و قانون کے دائرہ میں رہتے ہوئے مجوزہ آزادی مارچ کیا جاتا ہے تو اس کی اجازت دی جائے گی ۔
ادھر ڈان نیوز ٹی وی کو ترجمان وزیراعظم ہاؤس نے بتایا کہ وزیراعظم احتجاج کے جمہوری حق پر یقین رکھتے ہیں ۔ ان کا مزید کہنا تھا کہ مظاہرین کو اس وقت تک احتجاج کی اجازت ہوگی جب تک وہ سپریم کورٹ اور اسلام آباد ہائی کورٹ کے ماضی کے فیصلوں کی روشنی میں شہریوں کی روز مرہ زندگی متاثر نہ ہو ، تاہم جہاں ایک طرف اپوزیشن کو آزادی مارچ کی اجازت دی گئی ہے تو وہی اسلام آباد پولیس نے مظاہرین کو ریڈ زون میں پہنچنے سے روکنے کےلئے حساس علاقوں کو کنٹینرز منگوالیے ہیں ۔
کوئی تبصرے نہیں:
ایک تبصرہ شائع کریں