کراچی (عصرنو) وفاق المدارس کے سابق سربراہ مولانا سلیم اللہ خان مرحوم کے صاحبزادے اور مہتمم جامعہ فاروقیہ مولانا ڈاکٹر محمد عادل خان اور ان کے ڈرائیور قاتلانہ حملے میں شہید ہوگئے۔
پولیس کے مطابق مولانا ڈاکٹر عادل خان ویگو گاڑی میں شاہ فیصل کالونی نمبر 2 میں موجود تھے، کہ ان کی گاڑی پر مبینہ طور پر موٹر سائیکل سوار ملزمان نے فائرنگ کی۔
پولیس ذرائع کے مطابق انہیں فوری طور پر ہسپتال روانہ کیا گیا۔ لیاقت نیشنل اسپتال ذرائع کے مطابق مولانا عادل خان ہسپتال لائے جانے کے دوران انتقال کر چکے تھے۔ ہسپتال ترجمان کے مطابق مولانا عادل خان کو دو گولیاں لگیں۔
جناح اسپتال کی ڈائریکٹر ڈاکٹر سیمی جمالی کے مطابق فائرنگ کے واقعے میں جاں بحق مقصود نامی شخص کی میت جناح اسپتال کی ایمرجنسی پہنچائی گئی ہے۔
ڈاکٹر عادل خان جامعہ فاروقیہ کے مہتمم تھے اور وفاق المدارس العربیہ الباکستان کے سابق سربراہ مولانا سلیم اللہ خان کے صاحبزادے تھے۔
کوئی تبصرے نہیں:
ایک تبصرہ شائع کریں