سید محمد مہدی المعروف رئیس امروہوی برصغیر کے بلند پایہ شاعر ، ممتاز صحافی اور اردو کے مایہ ناز شاعر تھے ۔
آپ 12 ستمبر 1914ء کو یوپی کے شہر امروہہ کے علمی و ادبی گھرانے میں پیدا ہوئے ۔
ان کے والد علامہ سید شفیق حسن ایلیا بھی ایک خوش گو شاعر اور عالم انسان تھے ۔ آپ سید محمد تقی اور جون ایلیا کے بڑے بھائی تھے ۔
رئیس امروہوی 1936ء میں صحافت سے وابستہ ہوئے ، انہوں نے قیام پاکستان سے قبل امروہہ کے اخبارات قرطاس اور مخبر عالم کی ادارت کی ۔ بعد ازاں روزنامہ جدت (مرادآباد) کے مدیر اعلیٰ رہے ۔
قیام پاکستان کے بعد انہوں نے کراچی میں سکونت اختیار کی اور روزنامہ جنگ کراچی سے بطور قطعہ نگار اور کالم نگار وابستہ ہوگئے ، اس ادارے سے ان کی یہ وابستگی تا عمر جاری رہی ۔ رئیس امروہوی کے شعری مجموعوں میں الف ، پس غبار ، حکایت نے ، لالہ صحرا ، ملبوس بہار ، آثار اور قطعات کے چار مجموعے شامل ہیں ۔ جبکہ نفسیات اور مابعدالطبیعات کے موضوعات پر ان کی نثری تصانیف کی تعداد ایک درجن سے زیادہ ہے ۔
22 ستمبر 1988ء کو رئیس امروہوی ایک نامعلوم قاتل کی گولیوں کا نشانہ بن گئے ۔ رئیس امروہوی کراچی میں سخی حسن کے قبرستان میں آسودۂ خاک ہیں ۔
کوئی تبصرے نہیں:
ایک تبصرہ شائع کریں